Psa 112 | TVK | STEP | !Ripet rat his Iahova! Ngan xa di merere ni Iahova iti e sien. Ngan xa ien bei tengan ihusil xat Rae nan xil, xi imaal vehakut.

Psalms 112

Memaalen Iti mi Ngan Xil xa Sexien Nae Xil Bos

1 !Ripet rat his Iahova!

Ngan xa di merere ni Iahova iti e sien.
Ngan xa ien bei tengan ihusil xat Rae nan xil, xi imaal vehakut.
2 Horamue xil na moletin xa sexien nan bos, xil mei lihe vat xil te kantri nae.
Tuxolxatien na Hi iti mi ngan xil xa listal e vatimol nan.
3 Vatimol nan xil likamet hosien,
polien nae xa nggusil sexien te momalen iti vehakut.

4 Meulien nan di dutou ni moletin hos xil,
xi nggoni miehen xa di mileluv e ut te maluxoluk.
Xi bos mi mosav xil e di pisen esaeen nan mi xil,
polien nan xil momal tevi.
5 Ihos mi ngan xa di pol ni polien nan e rin xa momal,
e mae ni moletin sav xil mei laleh mani tengan lisa xolesi,
6 vengan xi xa be moletin hos tei, melengien te xeih xil misakras vapurun ni,
e moletin savsav xil lasakras iexil vabong ni hosien nan.
7 Ulin takan ti melele xa minggur longeongen tei xa misa,
vengan xa neketen nan nggeih e mikila xa Hi ihur xole.
8 Xi tanexo ti e ulin takan ni ti neta,
vengan mikila xa Hi ihas tan ni ngan xil xa di labae mini.
9 Xi di misa tutouen mi ngan xil vus xa labe tamure ni neta,
sexien nan momal vehakut.
Xeihen iti e hen
e moletin limerere ni.
10 Melele xa moletin xil xa lasa lipusi,
iexil iati e mete ipili xati.
E lingxatien nae imei ihe neta sav tang, e likesae.